སྨན་པ་ཉི་ཟླ་ལྕེ་ནག་ཚང་།

སྤྱི་ལོ་༡༩༧༡ལོའི་དགུན་ཁར་སྐྱེས།

ལོ་ཆུང་དུས་ནས་འབྲོག་པའི་སྦྲ་གུར་སློབ་གྲྭར་བསྐྱོད།  དེ་རྗེས་སུ་རྨ་ལྷོ་མི་རིགས་སློབ་འབྲིང་དུ་ཞུགས།

༡༩༨༥ལོ་ནས་༡༩༨༩ལོ་བར་རེབ་གོང་དགེ་འོས་སློབ་གྲྭ་འགྲིམས།

༡༩༩༠ལོ་ནས་རྨ་ལྷོ་རྫོང་སོག་བོད་སྨན་ཁང་དུ་བོད་སྨན་གཞུང་ལུགས་དང་ལག་ལེན་གཉིས་ཆར་སློབ་སྦྱོང་བྱས།

༡༩༩༡ལོ་ནས་༡༩༩༦ལོ་བར་དུ་བོད་ལྗོངས་གསོ་རིག་སློབ་གྲྭ་ཆེན་མོ་རུ་དེང་རབས་གསོ་རིག་གི་རྨང་གཞི་དང་། བོད་ཀྱི་གསོ་བ་རིག་པ་ལ་སློབ་གཉེར་བྱས།  བོད་ཀྱི་གསོ་རིག་གི་ལག་ལེན་ནི་ལྷ་ས་སྨན་རྩིས་ཁང་དང་ལྷོ་ཁ་སྨན་རྩིས་ཁང་དུ་སྦྱངས།

ཁྱད་པར་དུ་མཁན་པོ་ཚུལ་ཁྲིམས་རྒྱལ་མཚན་དང་མཁན་པོ་ཁྲོ་རུ་ཚེ་རྣམ་མཆོག་ཟུང་ལས་བོད་ཀྱི་གསོ་བ་རིག་པ་དང་གཡུ་ཐོག་སྙིང་ཐིག  གསང་སྔགས་སྐོར་ལ་སོགས་པ་སྦྱངས། དེ་དང་མཉམ་དུ་རྣལ་འབྱོར་མ་ངག་དབང་རྒྱལ་མཚན་དང་ཆོས་ཉིད་རིན་པོ་ཆེ་ལ་སོགས་པ་ནས་རྙིང་མའི་ཆོས་སྐོར་བཀའ་གཏེར་གྱི་དབང་ལུང་ཁྲིད་གསུམ་མང་དུ་ཞུས།

༡༩༩༧ལོར་ལྷ་ས་མྱུར་སྐྱོབ་སྨན་ཁང་དུ་དེང་རབས་སྨན་གྱི་སློབ་སྦྱོང་དང་དེའི་སྐོར་ལ་སྐད་བསྒྱུར་བྱས།

༡༩༩༨ལོ་ནས་ཡོ་རོབ་ཏུ་སོང་སྟེ་བོད་ཀྱི་གསོ་རིག་ལ་ཞིབ་འཇུག་དང་སློབ་ཁྲིད་བྱས།

༢༠༠༦ལོར་རྒྱལ་སྤྱིའི་བོད་ཀྱི་གསོ་རིག་གླིང་བཙུགས། རྒྱལ་སྤྱིའི་བོད་ཀྱི་གསོ་རིག་གླིང་གི་ཡན་ལག་རྒྱལ་ཁབ་ཉི་ཤུ་ལྷག་ལ་ཡོད། ཡོ་རོབ། ཨ་མེ་རི་ཁ།ཨ་ཧྥེ་རི་ཁ། ཨ་ཤེ་ཡ། ཨོ་སི་ཁྲུ་ལི་ཡ་སོགས་སུ་ཡོད་པའི་རྒྱལ་སྤྱིའི་བོད་ཀྱི་གསོ་རིག་གླིང་གི་ཡན་ལག་ཁག་ལ་གསོ་རིག་ཁང་ཟེར།  ཕྱི་རྒྱལ་གྱི་སློབ་མ་ཁག་ལ་བོད་ཀྱི་གསོ་རིག་རྒྱུད་བཞི་དང་། གཡུ་ཐོག་སྙིང་ཐིག བོད་ཀྱི་བསྐུ་མཉེའི་ལག་ལེན། རྟེན་འབྲེལ་སྔགས་བཅོས་རིག་པ། བོད་སྨན་སེམས་ཁམས་རིག་པ། རྨི་ལམ་རིག་པ།     སྨན་གྱི་དཔྱད་བཅོས་ལ་སོགས་པ་སློབ་ཁྲིད་བྱེད་ཀྱིན་ཡོད།  དེ་ག་ནང་བཞིན་བོད་ཀྱི་སྨན་སྦྱོར་རིག་པ་དང་དཔྱད་བཅོས་ལ་ཕྱི་རྒྱལ་ལུང་པའི་ཁྲིམས་ལྡན་གྱི་ཞིབ་འཇུག་བྱེད་ཀྱིན་ཡོད། རྒྱལ་སྤྱིའི་བོད་ཀྱི་གསོ་རིག་གླིང་གིས་བོད་ཀྱི་གསོ་རིག་གི་དེབ་མི་འདྲ་བ་མང་པོ་ཞིག་ཕྱི་རྒྱལ་གྱི་སྐད་བཅུ་ལྷག་ཙམ་ཞིག་ལ་སྒྱུར་དང་བསྒྱུར་བཞིན་པ་ཡིན།